Mukamurenzi waciye agahigo mu kwiruka n’ubu aracyabikora

Sangiza abandi

Umunyarwandakazi wabiciye bigacika mu myaka yo hambere mu kwiruka, kwesa imidari ndetse no guca uduhigo na n’ubu aracyasiganwa n’ubwo ageze mu za bukuru aho aba mu Bufaransa. 
Mu kiganiro Mukamurenzi yagiranye n’urubuga Ireme.net tunakesha iyi nkuru, bavuga ko Mukamurenzi Marisiyiana yabaye icyamamare mu masiganwa yo kwiruka ahantu harehare. Ushyize hamwe imidari yose yatsindiye mu gihe yamaze akora amarushanwa yo kwiruka, nta Munyarwanda n’umwe wundi nyuma ye wabashije nibura kumuyingayinga, (…)

Umunyarwandakazi wabiciye bigacika mu myaka yo hambere mu kwiruka, kwesa imidari ndetse no guca uduhigo na n’ubu aracyasiganwa n’ubwo ageze mu za bukuru aho aba mu Bufaransa.

Mu kiganiro Mukamurenzi yagiranye n’urubuga Ireme.net tunakesha iyi nkuru, bavuga ko Mukamurenzi Marisiyiana yabaye icyamamare mu masiganwa yo kwiruka ahantu harehare. Ushyize hamwe imidari yose yatsindiye mu gihe yamaze akora amarushanwa yo kwiruka, nta Munyarwanda n’umwe wundi nyuma ye wabashije nibura kumuyingayinga, haba mu gutsindira imidari myinshi cyangwa se iy’agaciro, haba no mu kumenyekana. Ni nawe Munyarwanda wenyine witabiriye imikino Olympiques inshuro eshatu.

Ubuhanga bwa Mukamurenzi mu kwiruka bwatumye mu bihe binyuranye hari abamufasheho igisa n’iimvugo nsigamugani, bamwe bati: “Uzibeshye unkurikire nzakwereka aho mbera Mukamurenzi”, abandi bati: “Uriya ntimwahiga ni Mukamurenzi”

Ibigwi bya Mukamurenzi Marisiyana

Amarushanwa yagiye yitwaramo neza ni ay’ahantu harehare nka metero 1500, 3000, 5000, 10000 na Marathon.

Nk’uko urubuga Ireme.net rukomeza rubitangaza ngo kugeza ubu, Mukamurenzi Marisiyana niwe Munyarwanda wenyine washoboye kubona umudari mu mikino Nyafurika, hari mu mwaka w’1987.

Mukamurenzi yabonye umudari wa Feza (argent) mu kwiruka metero ibiumbi icumi (10 000 m) mu mikino ngororamubiri yari yabereye i Nairobi muri Kenya.

Mukamurenzi yegukanye umwanya wa mbere muri Cross Internacional Juan Muguerza muri Espagne mu mwaka w’1990.

Mu mikino y’Afrika yo hagati yabereye i Luanda mu 1981, Marisiyana Mukamurenzi yegukanye imidari ibiri ya zahabu mu kwiruka metero 1,500 na metero 3,000.

Mu mikino y’Afrika yo hagati yabereye i Brazzaville mu mwaka w’1987, Mukamurenzi yegukanye imidari ibiri ya zahabu muri metero 1500 na Metero ibihumbi icumi.

Mu mukino ya Francophonie yabereye muri Maroc mu mwaka w’1989, yabonye umudari wa zahabu (Or/Gold) mu kwiruka metero ibihumbi icumi (10 000), ndetse abona n’umudari wa Feza (Argent) mu kwiruka metero ibihumbi bitatu (3000 m).

Mukamurenzi yatsindiye umwanya wa mbere muri “Lotto Cross Cup de Hannut” mu Bubiligi mu mwaka w’1991.

Yabonye umwanya wa mbere mu kwiruka metero 10 000 mu mikino ngororamubiri ya Afrika yabereye Annaba muri Algérie mu mwaka w’1988.

Kanda hano urebe incamake ku marushanwa Mukamurenzi yatsindiye mu bihe binyuranye.

Yagiye mu mikino Olympiques inshuro eshatu zikurikirana

Marisiyana Mukamurenzi niwe Munyarwanda wagiye bwa mbere mu mikino yo ku rwego rw’isi “Olympics” iba rimwe buri myaka ine. Yahagarariye kandi u Rwanda mu mikino myinshi ku rwego rw’isi irimo:

Imikino Olempiki i Los Angeles mu 1984, i Seoul mu 1988 n’i Barcelone mu 1992.

Muri shampiyona z’isi mu mikino ngororamubiri i Helsinki mu 1983, i Roma mu 1989, n’i Tokyo mu 1991.

Kugeza ubu aracyafite imihigo w’u Rwanda mu rwego rw’abagore mu kwiruka metero 3000 na metero 10000. Umuhigo wa Marathon nawo yari afite weshejwe na Epiphanie Nyirabarame i Berlin mu 2009.

Andi mateka ya Mukamurenzi, hanze y’ubuzima bw’amasiganwa
Mukamurenzi yavukiye ku Gisenyi mu Rwanda kuwa 4 Kamena w’1959 avukira mu muryango w’abana icyenda, ubu afite imyaka 53. Yatangiye kwitoza ibyo gusiganwa k’umuguru nk’umwuga mu mwaka w’1975, yari afite imyaka 16. Imyaka umunani nyuma yaho, yahagarariye u Rwanda mu marushanwa y’imikino ya Olympiques mu mwaka w’1984 i Los Angeles muri Leta Zunze Ubumwe za Amerika (USA).

Yaje kujya kwitoreza mu Bufaransa mu 1987, aranahatura mu mu mujyi wa Bordeaux kugeza mu mwaka w’1994 ubwo yatashye mu Rwanda agiye kubana n’umugabo bari bararushinze mu mwaka w’1993.

Intambara yahise itera ahungira muri Congo yitwaga Zaïre icyo gihe. Nyuma yageze muri Cameroun, abifashijwemo n’uwahoze ari Umutoza we Roger Grange, abasha gusubira kuba i Bordeaux mu Bufaransa ahagana mu 2003.

Mukamurenzi mu zabukuru

Magingo aya, Mukamurenzi Marcianne, akora akazi k’uburinzi (gardienne d’immeuble) mu mujyi wa Bordeaux ariko akomeza kwirukanka mu marushanwa amwe n’amwe. Ariko ikimubabaza n’uko adafite ubwenegihugu bw’u Bufaransa ibyo bigatuma iyo atsinze intsinzi ye itagira agaciro mu rwego rw’igihugu. N’uwbo Mukamurenzi akuze, akomeje gutsinda amarushanwa menshi mu ikipe yitwa club d’athlétisme de Léognan yirukankamo.

Ku babashije kumenya Mukamurenzi, umuhigo we mu kwiruka ntawe urawuhigura mu Banyarwanda bamukurikiye.

IREME NEWS

ireme.net / ireme.org

Leave a Reply

Your email address will not be published. Required fields are marked *