Koko umuco wacu uducike ucure ucike uce ducweze ngo cwe?

Ikinyarwanda n’umuco gakondo kavukire ni bimwe mu bigenda bita ireme mwimerere, hakaba n’abikanga ko kera kabaye bizakendera niba bidasigasiwe rikiva. Ese ko hari Minisiteri ifite umuco mu nshingano, hakaba n’inzego ziyunganira, iyi sambu yonwa ite?

Kuvangavanga inshingano, kuzitiranya, kwikwizaho iz’abandi ukibagirwa cyangwa ukirengagiza izikureba, ni indwara ituma inshingano zitagerwaho. Mu bihe bishize, Minisiteri y’Umuco na Siporo yabaye urugero rwiza rw’imikorere iteye ityo, bigatera kwibaza niba koko u Rwanda nk’igihugu rukeneye iyi Minisiteri.

Umuhanga yaritegereje aravuga ngo ‘Guta igihe ni ugukora icyo utagombaga gukora, ni no kudakora icyo wagombaga gukora.’ Gutakaza imbaraga nyinshi mu bidakenewe cyangwa se bifite bene byo bakabikoze, bigira ingaruka zo kudatunganya ibyawe bikureba, kuko uba wamariye imbaraga aho zidakenewe, aho zikenewe zikaba nkene. Iri huzagurika mu nshingano ni kimwe mu byaranze Minisiteri yitwa iy’Umuco na Siporo (MINISPOC).

Ese ubundi iyi MINISPOC irakenewe mu Rwanda ? Igice cya I

Nk’uko izina riri, MINISPOC ni Minisiteri y’Umuco na Siporo, ibi byombi bikaba mu nshingano zayo nyamukuru, igihugu cyose niyo gihanga amaso ku iterambere ryabyo, ni nayo yakaryojwe iby’idindira rya kimwe muri byo, cyangwa se byombi. Ariko se biratera imbere cyangwa ahubwo birakura nk’umuhini w’isuka?

Iyo usuye urubuga rwa MiNISPOC, uhasanga intumbero, intego n’inshingano zayo

Intumbero (Vision): Kugaragaza u Rwanda nk’igihugu gifite umuco wo gukora siporo no gushingira iterambere ku muco warwo.

Intego (Mission): Gushyiraho no gushyigikira Politiki n’ingamba zo guteza imbere umuco w’intsinzi muri siporo no gutuma umuco uba ishingiro rya gahunda z’amajyambere

Inshingano: Gushyiraho uburyo bwo gutuma politiki n’ingamba zo guteza imbere Siporo n’umuco zimenyekanishwa kandi zigashyirwa mu bikorwa hagamijwe kugera ku musaruro utegerejwe; Gushyiraho amabwiriza agenga ibikorwa bya Siporo n’Umuco ku bafatanyabikorwa; Gushyiraho no kumenyekanisha amahame ngenderwaho mu bikorwa bya Siporo n’Umuco; …

Gusubira inyuma kwa Siporo, gutaguza mu rugendo n’imishinga ihera nzira

Hanze aha iyo uganira n’abakunzi b’imikino y’ingeri zinyuranye, usanga baririmba “Kera habayeho …”, bagatanga ingero ku Mavubi yagiye muri CAN, Rayon Sports na APR zitwara CECAFA, Amavubi ahigika Ghana n’ibindi. Bakwibuka abakinnyi ba vuba, ugasanga baririmba Karekezi, Kawembe, Gatete Jimmy, Manamana, … ibigwi bya none bikaba bike.

Hakaba n’abagera mu myaka ya kure, bati: “Duheruka Football ku bwa ba Ndanda, Muvala Valens, ba Mudeyi (uko ari batatu), Lisala, Tigana, Napoleon, Ngabonzima, Kabutura, Kagurube, Gatama, tukibuka amakipe nka Panthères Noires, STIR, Mukungwa, Éclair, Durandal, Kilovolt, …” Hari n’abagaruka hafi aha, bakakwibutsa amateka y’ikipe ebyiri z’u Rwanda zigaragaje neza muri Football , Rwanda A na Rwanda B, bakabivuga bizihiwe.

Iyo bitabaye Football, biba ari isiganwa ry’imodoka, amapikipiki cyangwa se gusiganwa ku maguru, aho kugeza n’ubu Mukamurenzi Marisiyana akiri indahiro ya bamwe ku gusiga imvura n’umuyaga.

Mu magare, Valens Ndayishimiye aherutse guhesha ishema u Rwanda, aha ntawakwirengagiza uruhare rwa MINISPOC ariko nanone ababikurikiranira hafi bakemeza ko habayeho imbaraga n’ubwitange by’abakinnyi ku giti cyabo n’amakipe babarizwamo, kurenza uruhare rwa Minisiteri ifite imikino mu nshingano.

Mu zindi siporo, nta warenza ingohe ibigwi bya APR Volley Ball Club, KVC, n’zindi mu myaka yashize, kuri bamwe ubu bisigaye ari inkovu z’imiringa.
Ese gusubira inyuma kw’imikino, kudindira no kugwa kwayo byaba biterwa n’iki mu gihe hari Minisiteri ishinzwe iterambere ry’imikino?

Ese ko za sitade zubakwa zigahera inzira igati, izindi zigasizwa zigahingwa ibigori, izindi zigatura mu ntekerezo cyangwa mu nyandiko zibitse neza, byaba biterwa no kuba inkono idahira ikibatsi ngo dutegereze ikibariro? Cyangwa byabuze gikurikirana?

Hari ubwo umuco wacu wazasigara ucibwa bugani

Magingo aya, abato n’abakuru bemeranya ko umuco watakaye, ko batanakimenya neza ikiri umuco munyarwanda n’ikitari wo, ababihinira bugufi bakibwira ko umuco ari imbyino gakondo nsa, amahamba n’amazina y’inka, gucuranga ihembe, iningiri, inanga, umuduri, icyembe n’urutaro, bigacira aho. Ariko se niko biri koko?

Za ndangagaciro, rya shyaka, cya gihango, bwa bupfura, rya banga, ya sano, wa muriri, za ntashyo, ya marwa, ya mfizi, rya pfundo, wa muyange, rya riba, za Ntore-butore ziri izina, rya shema riganje ijabo, wa mutuzo, bwa bwenge, rya nyurabwenge, ya Mana izisumba, ka kagabo kangana urwara kangana u Rwanda, ya migani, ya makaraza, rya tyazo, wa mushogoro, ya mpumeko-Rwanda, rya vumera, rya vuba, cya cyoko, cya cyezi, kwa kwezi, urya mwezi, bwa busuna, ba basare, ya misango, bwa busabane, rya susuruka-susurutsa, ya ntango, rya robe, ya mihigo, kwa kwivuga, rya tabaro, ya mpinga, rya bumba, ya ngabe, bwa bugabe, bwa bugabo, bwa buvanganzo, ya nganzo, bwa bwiru, bwa buntu, bwa bumuntu … Tubihebe pe, turuce turumire ngo aha, ni uko abitirirwa kubizamura batazi izikamwa n’izatetse?

Ese umuco wacu uducike ucike uce ducweze ngo cwe?

Ese ko agahugu kabuze umuco gacika, twaba ducikiye he, byagera iyo twaciwe kiru ki ngo kibure, byacurerwa twaciwe bicuma ki by’ibura, twajya kugusha ishyano ngo ishyanga ridukwene, inshyomotsi zigashyungumbwa zidushyagariza ku bwa gati ki, katubuza kujisha umuco munyarwanda ngo uteke ijabiro?

Ikinyarwanda cyo se?

Uwavuga iby’ururimi ‘Kinyarwanda’ gakondo k’abo dushamitse, byaba kuvuga ay’inzuki abuza umwami kunywa umutsama ngo acurure inturire, kuko burya ujya kuvuga aba atarabona. Kanyarwanda yabivuze ukuri ngo: Hataka Nyiri ubukozwemo, Nyiri ubuteruranywe n’akebo ntiyarushya avuga”. Ese aho Ikinyarwanda cyaba kikibarizwa muri ako kebo?

Ararekwa ntashira, duhiniye aha, tuzasubukura mu gice cya kabiri twibaza dusesengura ibi bikurikira:

-

  Ese ko umukenyero ugirwa n’umwitero, aho umuco na Siporo ntibyaba ari umwambaro w’amabara adahuye?

-

  Ese ko umutsima ugirwa n’umushogoro, aho guhuza umuco na siporo ntibyaba nko kurya imiteja uyisomeza ikivuge?

-

  Ni gikorwa ki cy’umuco kibarizwa kandi kigasohorezwa muri Minisiteri yitirirwa umuco?

-

  Ese ko haba ubwo zimwe mu nshingano za MNISPOC zimirwa n’itorwa, ikurikiranwa n’ituzwa ku idembe ry’abitwa “Miss”, byo byitwa muco wa gihugu ki, bibarizwa mu buhe bwoko bwa siporo?

-

  Ese ko abashinzwe iterambere ry’umuco muri Ministeri iwitirirwa badasiba mu birori bya ‘mva-he-na-njya-he’ (imideri, urwenya, ibitaramo mpushareme, Salax, Guma Guma, n’ibindi), bihuriye he n’umuco, bipfana iki na siporo?

-

  Ese kujambura Ikinyarwanda, kugisesengura, kugikosora, kugisigasira, kugikungahaza n’ubundi bushakashatsi, ntibyaba byishyikira cyane ku mpuguke mu by’indimi n’uburezi kurenza uko byabarizwa mu mikino n’imyidagaduro?

Iyi gitabo ntigurishwa

-

  Mu bijyanye no ’Kwibuka’ (Nk’imwe mu nshingano za’iyi Minisiteri), ese ko CNLG yonyine ibarizwa muri MINISPOC, ariko IBUKA, AVEGA, AERG, … bikegamira inkingi yitwa MINALOC, aho CNLG ntiyayobokeshejwe irembo-mpabe?

-

  Ese ko MINISPOC iba nyambere mu bikorwa by’urubyiruko kandi rwarimuriwe ahandi (MYICT), ntibyaba ari ukwitiranya bitihise gushimuta inshingano?

-

  Ese ko MINISPOC isabayanga mu bikorwa nyaburanga n’Ubukerarugendo (Kabone n’iyo byaba atari ingoro ndangamurage), yaba ifite ishami rya RDB riyikoreramo, cyangwa ni ishyaka ryinshi ryo gukusanya no gukomatanya?

-

  Ese ko isuri isambira byinshi igasohoza bike, ’MINISPOC-Rukusanya’ isohoza ibingana iki mu mpuzandengo mpamyangiro?

Dusesengure twiyubaka, twubaka igihugu.

NTWALI John Williams

tugomba kugera mwiterambereMusubize2015-03-11 22:16:59
Igiraneza cynthia
@Dudu, umenya witiranyije ibintu.Twe nk’abasomyi ntituri kureba icyo umunyamakuru apfa n’abo uvuga ko yanditseho,ahubwo turaoma natwe tugasesengura ngho tumenye niba koko ibyo yavuze atari byo,twaba tutemeranyw atukamunyomoza.Ahubwo se nihe wasanze yibeshye?Musubize2015-03-11 22:22:28
Ruberwa
ariko uwo ntwari wirirdwa anenga ibyo abandi bakora we niki?ninde wamugize umuvugizi cyangwa umugenzuzi wabatagira icyo bakora?ibye se buriya abikora neza di?ashinzwe kwirirdwa akurura amatiku?niyitonde ubamba isi ntakurura.nagabanye kwirirdwa yivanga mumirimo itamureba dii.Musubize2015-03-10 11:36:39
dudu
byarayoberanye ese ururimi rwacu rwo rwatera imbere rute mugihe nta form nimwe wasangaho ikinyarwanda.Musubize2015-03-08 12:56:03
karangwa
Umuco wacu uranze uracitse koko?Musubize2015-03-08 11:16:26
Nshimiyimanajdedieu@gmail.com
Iby’imyandikire y’ikinyarwanda byo bintera kwibaza aho tugana maze bikanyobera. Mundebere namwe kuri kiriya gitabo ku gifuniko cyacyo ngo: Iyi gitabo ntigurishwa. Ngasanga abana bacu bigishwa uburagi aho kuba ikinyarwanda.Musubize2015-03-08 08:03:30
Nganzo Julais
Iby’imyandikire y’ikinyarwanda byo bintera kwibaza aho tugana maze bikanyobera. Mundebere namwe kuri kiriya gitabo ku gifuniko cyacyo ngo: Iyi gitabo ntigurishwa. Ngasanga abana bacu bigishwa uburagi aho kuba ikinyarwanda.Musubize2015-03-08 08:03:30
Nganzo Julais
Ariko se koko wa mugani w’umwanditsi,tuvuge ko muri iki gihugu habuze abantu bumva neza kandi basobanukiwe icyo umuco ari cyo ngo babikurikirane?Niba se badashobora guhabwa akazi,ntibanashobora kugishwa inama ngo batange umusanzu wabo?Musubize2015-03-08 11:16:26
Marcel
Ariko se koko wa mugani w’umwanditsi,tuvuge ko muri iki gihugu habuze abantu bumva neza kandi basobanukiwe icyo umuco ari cyo ngo babikurikirane?Niba se badashobora guhabwa akazi,ntibanashobora kugishwa inama ngo batange umusanzu wabo?Musubize2015-03-08 11:16:25
Marcel
Aho ndabemeye pe! nyabuneka umuco uraducika. nano Minispoc yo koko yabaye rukusanya nyamara ibyo isohoza ni bike.Aho kwirirwa bahindura abayiyobora babanze basubire Ku nshingano ziyo ministere.Musubize2015-03-08 11:16:06
Jolie
Rwose nshimiye byimazeyo NTWALI John Williams wabashije gusesengura ibi bintu. Mpora nibaza ahantu ministere y’umuco ihurira na sport byaranyobeye. Ibi bintu byanditwa bikwiye gusomerwa inteko shinga mategeko na Sena bakabyumva neza ubundi bagatora itegeko ribitandukanya kuko ntaho bihuriye ninayo mpamvu ntanakimwe kigira icyo kigeraho. Uretse guhuzagurika gusa ntakindi.Musubize2015-03-07 17:47:57
manock
ese koko umuco abakera baduha ntahantu wo watokowe? generation ihari nyishi ubu muri 1994 bari ibitambambuga ndakeka bisanze urwanda ruri kwiyubaka ese koko iyo bavuga abakera ngo umuco waratakaye bibagirwa umusaruro wumuco wabakera uko byaragiye ? habaye genocide jyewe umuti natanga abakuru baducagurire ibyiza byakera cgne cgne indangagaciro hanyuma bareke tubihuze nibyo twakuze tureba ndavuga ibyubu kuko ntibishoboka gukora ibyakera tukibagirwa ibyo tubamo buri munsi ikoranabuhanga nibindi tubona buri munota murakozeMusubize2015-03-07 17:47:52

Leave a Reply

Your email address will not be published. Required fields are marked *