Bakubiswe batara amakuru y’umuyobozi wa Good Rich TV ushinjwa guhohotera abakozi

Sangiza abandi

Urwego rw’Abanyamakuru bigenzura rwamaze kwakira ikirego cy’abanyamakuru babiri bakubiswe n’Umuyobozi w’ikigo GoodRich, bikekwa ko yabahoye gutara amakuru atifuzaga ko ashyirwa ahagaragara, kuko ashinjwa na bamwe mu bo akoresha kubahohotera.

Inkubiri yo gutara amakuru yaje nyuma y’aho ku mugoroba wo ku wa 11 Werurwe 2015 humvikanye abakobwa batatu basanzwe bakora itangazamakuru kuri Televiziyo nshya yitwa GoodRich ikorera mu Mujyi wa Kigali birukanywe mu buryo butunguranye, bivugwa ko banashyizweho igitutu babwirwa ko nibadasohoka mu kigo hiyambazwa ingufu bagasohokamo ku nabi.

Kuba batari barahembwe, byatumye bashakisha uko bamenyekanisha ikibazo cyabo mu buryo bwihuse, bahamagara bamwe mu banyamakuru ngo babibamenyeshe.

Ubwo Abanyamakuru babiri, Ndabarasa John na Obed, bahamagaraga Umuyobozi wa GoodRich TV Francis Habumugisha, yabasabye kugera aho akorera bakaganira imbonankubone.

Bavuga ko bakihagera Francis yahise ategeka abashinzwe uburinzi bw’ikigo gufunga imiryango yose,abakubita ababwira ko batagomba kwivanga muri bushabitsi bwe (business).

Mu kubakubita abaka ibikoresho byabo, Ndabarasa John yahakomeretse urutoki rw’igikumwe cy’iburyo, ubwo yangaga kwakwa akuma gafata amajwi (recorder).

Amakuru ashyushye birukiye ni yo yabakozeho

Nkuko aba bakobwa batatu (Joannah, Honorine na Louise) babitangaza kandi bakabihurizaho, Umuyobozi w’Ikigo Good Reach bakorera yagiye abasaba mu bihe binyuranye umwe ukwe kumusanga mu biro, bakibwira ko ari iby’akazi ariko bagasabwa kumugaburira, ndetse akabahatira gusangira (…).

Imbarutso nyirizina yo kwirukanwa yabaye kubasaba gukorera “massage” abashyitsi be, abakobwa barabyanga bavuga ko ntabyo bize kandi ko atari nako kazi basabye.

Bemeza ko icyo gihe ari bwo Francis yahise ategeka ko birukanwa, mu gutabaza, abanyamakuru bari bakurikiye inkuru y’imvaho bahura nuruva gusenya nk’uko babivuga.

Umwe mu bakozi b’iyi televiziyo yavuze ko bo ubusanzwe gukubitwa babimenyereye, ariko ko batari bazi ko hari n’intera yo kuba n’abanyamakuru b’ibindi bigo bahakubitirwa…

Hiyambajwe Polisi mu Mujyi wa Kigali

Bivugwa ko Francis akimara guhondagura abanyamakuru yahise ahamagara Umuyobozi wa Polisi mu Mujyi wa Kigali, ACP Rogers Rutikanga, amubwira ko yatewe n’abanyarugomo biyise abanyamakuru. ACP Rogers yavuganye na bo bamusobanurira ikibazo, abagira inama yo gutanga ikirego.

Mu gushaka kuvugana na nyiri ubwite (Francis) ntibyabashije gushoboka kuri telefoni, ariko abanyamakuru bo bemeza ko bamaze gutanga ikirego mu Rwego rw’Abanyamakuru Bigenzura (RMC).

Tega amatwi bimwe mu bivugwa n’abanyamakuru birukanywe

Joannah ahamya ko yasagariwe asabwa gukora ibyo atahamagariwe kandi bitamuhesha icyubahiro.

Uzamukunda Honorine avuga uko yagezwe amajanja ku bikorwa by’urukozasoni, akemera guhara akazi

NTWALI John Williams

2 thoughts on “Bakubiswe batara amakuru y’umuyobozi wa Good Rich TV ushinjwa guhohotera abakozi

Leave a Reply

Your email address will not be published. Required fields are marked *