Umuyobozi wa GoodRich TV yafatiwe ibihano azira guhohotera abanyamakuru

Sangiza abandi

Urwego rw’abanyamakuru bigenzura(RMC) rwafatiye ibihano Dr Francis Habumugisha uyobora GoodRich TV, kuri uyu wa 31 Werurwe 2015, nyuma yo guhamwa n’icyaha cyo guhutaza akanahohotera abanyamakuru; Yahanishijwe gucibwa amande no kwishyura ibikoresho byabo yangije.

Ikibazo cyatangiye ubwo Dr Francis yafataga abakobwa batatu bakora kuri Televiziyo ye GoodRich nk’abanyamakuru, akabategeka kugusha neza abakinnyi b’imwe mu makipe akomeye mu Rwanda, babakorera ’massage’.

Bose barabyanze bavuga ko atari ko kazi basabye, abirukana igitaraganya nk’uko babyivugira. Mbere yo kuva mu kigo, abo bakobwa Gikundiro Jeannne d’Arc, Yamuragiye Marie Louise na Uzamukunda Honorine bahamagaye abandi banyamakuru ngo babamenyeshe ibibabayeho.

Ku ikubitiro abanyamakuru babiri bahise bahamagara Dr Francis ngo bamubaze ukuri kw’ibibaye ntiyagira icyo abasubiza, biba ngombwa ko bigerera aho ikibazo cyabereye ngo bakimenye mu mizi.

Abanyamakuru Obed Ndahayo ukorera Radio Amazing Grace na Ndabarasa John ukorera Sana Radio bavuga ko bakigerayo bafungiranyw emu kigo batangira kudihwa na Francis nyiri GoodRich TV afatanyije n’abazamu b’ikigo cye.

Uretse Ndabarasa John wahakomerekeye urutoki arwana ku kuma ke gafata amajwi bashakaga kumwambura, ibikoresho bye byarangiritse, kimwe n’ibya mugenzi we byangiritse bikanahaburira.

Biyambaje Umuyobozi wa Polisi mu Mujyi wa Kigali ACP Rogers Rutikanga, abagira inama yo gutanga ikirego muri RMC.

Nyuma yo kwakira ikirego, Urwego rw’Abanyamakuru Bigenzura rwagennye Komite Ngengamyitwarire igizwe n’abakomiseri batatu aribo Dr NKAKA Raphael, Madame INGABIRE Marie Immaculee na Cleophas BARORE ngo basuzume iki kirego banagifatire umwanzuro.

Tariki 23 Werurwe 2015 saa munani z’amanywa, impande zombi zaratumijwe zitanga ibisobanuro ku byo zivuga, uwo munsi ikibazo nticyarangira gusuzumwa, kirasubikwa cyongera gusubukurwa tariki 27 Werurwe 2015 hanatumijwe abatangabuhamya batandukanye.

RMC yemeje ko abanyamakuru bahutajwe kandi bagomba guhabwa indishyi

Nyuma yo gusesengurana ubushishozi ibyatangajwe n’impande zose zirebwa n’ikibazo, kuri uyu Kabiri, Komite yashyizweho na RMC yatangaje ibi bikurikira:

“Yemeje ko abanyamakuru NDABARASA John na NDAHAYO Obed bahutarijwe mu kigo cya Goodrich Tv kiyobowe na Dr Francis HABUMUGISHA bari mu kazi kabo, gusa bikaba bitoroshye kumenya niba ari Dr Francis ubwe cyangwa umwe mu bakozi be wabikoze. Ibi bikaba bibujijwe nk’uko biri mu ngingo ya 24 y’Amahame agenga umwuga w’itangazamakuru igira iti “Kurengera umunyamakuru. Hashingiwe ku mwuga wabo wihariye, umunyamakuru, aho ari hose mu gihugu agomba kugira uburenganzira busesuye ku mutekano we uw’ibikoresho bye, ku kurengerwa n’amategeko no ku iyubahirizwa ry’agaciro ke nta mananiza nta n’ibibanje gusabwa.”

Komite kandi yasanze Dr Francis yarimanye amakuru nkana nyamara biteganyijwe n’ingingo ya 21 mu mahame agenga umwuga w’itangazamakuru igira iti “Guhabwa amakuru nta kiguzi. Nk’uko biteganywa n’itegeko rigenga uburyo bwo guhabwa amakuru, umunyamakuru uri mu kazi, agomba guhabwa amakuru yose kandi afite uburenganzira bwo kugenzura mu bwisanzure ibikorwa byose bigenga ubuzima rusange.”

Ubwo Komisiyo ya RMC yatangazaga imyanzuro yayo

Nyuma yo guhamwa n’icyaha, RMC yagennye ibihano

Komite itegetse ko Dr Francis HABUMUGISHA ariha NDABARASA John telefone ze ebyiri zangijwe. Izi telefone zikazishyurwa NDABARASA atanze izangijwe agahabwa inshya zazo.

Komite yategetse ko ibikoresho bya NDAHAYO Obed (Camera na Recorder) nabyo byazarihwa ariko ari uko amaze kugaragaza ibimenyetso by’uko byaburiye koko muri GoodRich TV, kuko nta bimenyetso bihamye by’uko yinjiye abifite.

Ku birebana n’indishyi, Komite ndangamyitwarire yemeje ko Dr Francis HABUMUGISHA azishyura indishyi z’akababaro zishingiye ku guhutazwa bakorewe mu kazi kabo mu buryo bukurikira. NDABARASA John azishyurwa ibihumbi Magana abiri na mirongo itanu by’amanywaranda (250 000 FRW) na NDAHAYO Obed nawe akishyurwa ibihumbi Magana abiri na mirongo itanu (250 000 FRW).

Ishingiye ku busabe bwa GIKUNDIRO Jeanne d’Arc wasabye kurihwa umushahara w’ukwezi ndetse no kuba Dr Francis HABUMUGISHA yemera ko GIKUNDIRO yakoze kuri GoodRich ariko ari ngo ari umukorerabushake, hakaba nta bimenyetso byerekana ko yari umukorerabushake udahembwa, yemeje ko GIKUNDIRO ahabwa na GoodRich TV umushahara w’ukwezi ungana n’ibihumbi 100 000 by’amanyarwanda kuko twasanze ariyo umuntu ugitangira akazi muri Good Rich TV ahabwa.

RMC yasabye GoodRich TV kubahiriza amahame agenga umwuga w’itangazamakuru

Komite ishingiye ngingo ya 27 y’amahame ngengamyitwarire agenga umwuga w’Itangazamakuru igira iti “Amasezerano n’igihembo. Kubera umurimo n’inshingano byabo, umunyamakuru wese afite uburenganzira ku byiza biteganywa n’amasezerano rusange no ku masezerano yihariye y’akazi abateganyiriza umutekano w’akazi n’umutuzo n’uburenganzira ku gihembo gihwanye n’uruhare rwabo mu mibereho y’abaturage kandi gituma bihaza mu bukungu.” Irasaba GoodRich TV kubahiriza ibiteganywamo kimwe n’andi mahame yose y’umwuga.

RMC ntacyo yavuz eku bindi byaha bitareba umwuga w’itangazamakuru, nk’icyaha cyo gucuruza abana b’abakobwa (Human Trafficking) cyagarutsweho mu byatangajwe n’abakobwa batatu bahohotewe, n’ibindi bigishamikiyeho. Gikundiro Jeanne d’Arc yavuz eko bitarangiriye aha, ko azageza ikirego cye no mu zindi nzego bireba.

Abahohotewe bavugana n’Itangazamakuru

Ku ruhande rw’abanyamakuru babiri bahutajwe bakanahohoterwa, Obed na Ndabarasa bavuze ko n’ubwo indishyi bahawe ziri hasi cyane y’izo basabye, bashimishijwe no kuba ikirego cyabo cyarakiriwe kigahabwa agaciro, kandi RMC ikaba yakoresheje ubutabera nyabwo.

Umuyobozi wa Good Rich TV , Francis Habumugisha ntiyemeye kugira icyo avugana n’itangazamakuru kuri iyi ngingo.

Inkuru bifitanye isano:

NTWALI John Williams

One thought on “Umuyobozi wa GoodRich TV yafatiwe ibihano azira guhohotera abanyamakuru

Leave a Reply

Your email address will not be published. Required fields are marked *