Kuzamura ireme ry’ubuziranenge bizakemura byinshi byangirikira mu burangare

Sangiza abandi

U Rwanda rufite ikigo cy’igihugu cy’ubuziranenge RSB, ariko kitareba ubuziranenge bwa byose, kuko hari ahandi ubuziranenge burebwa na RURA, RGB n’izindi nzego zinyuranye.

Muri iyi nkuru turareba bimwe muri byinshi bikeneye gukurikiranirwa hafi ku ireme ry’ubuziranenge bwabyo, cyakora ntituvuga buri kigo kibishinzwe, izo nzego ziriyizi. Ese kuba bimwe bibura gikurikirana, aho ntibyaba biterwa no kuba hari zimwe mu nzego zibigonganiraho zigasigana, bikahadindirira?

  1. Isenyuka rya hato na hato ry’imihanda ikiri mishya

Ni kenshi hubakwa imihanda nyuma y’iminsi mike cyangwa amezi make ikangirika, hakabaho kuyiteramo ibiremo basanasana kaburimbo yarimbaguritse, cyangwa bakanawusenya igice runaka kigasubirwamo bundi bushya. Bitwara igihugu akayabo k’amafaranga yagakoze ibindi, kandi iki gihombo kiba gitewe n’iburareme ry’ubuziranenge byakoranywe.

Hari n’aho igice cy’umuhanda gitwarwa n’inkangu cyangwa isuri, ubundi umuhanda ukabyimba ugatangira gusumbana, bikangiza uruhengekero rwawo (pente), urugero nko mu ikorosi ribanziriza ku Giti cy’Inyoni, aho amakamyo apakiye yiyambaza umuhanda mpushane (Sens Unique) ngo adahirima kubw’uruhengero rw’umuhanda rwangiritse.

Hari kandi n’imihanda yubakwa ntigenerwe inzira y’amazi (canalisation), amazi akajya abuza ibinyabiziga gutambuka, ubundi agasenya umuhanda cyangwa inkengero zawo. Ingero z’imihanda yangirika ikiri mishya ni nyinshi, ariko izamenyekanye cyane ni umuhanda Musanze-Kigali, umuhanda Gatuna-Kigali, umuhanda Kigali-Kabuga, umuhanda uca gato ruguru ya Sopetrad washwanyutse ugafungwa uruhande rumwe, n’ahandi n’ahandi.

Umuhanda Kigali-Musanze wasenyutse utaranatahwa

Hano Minisitiri w’Intebe ari kugaragaza amakosa umuhanda wubakanywe, n’inenge ziri mu nzira y’amazi

  • Imiti yarengeje igihe

Biragoye ko umuturage usanzwe yamenya niba umuti ukoranywe ubuziranenge bwuzuye, adafite imashini zabugenewe zibasha kubipima. Ariko igitangaje ni ukuba mu mafarumasi no mu bigo nderabuzima hari aho bagitanga imiti isigaje ibyumweru bike cyangwa iminsi mike cyane ngo irangire, kandi uyihawe azayinywa igihe kirenze kuri iyo minsi.

Iyo hari ubigenzuye akabaza ngo bimeze bite,   asubizwa ko umuti udahita urangirana n’itariki yanditseho (Expiry date) ko ahubwo ngo uba ufite indi minsi /amezi arengaho yo kuba wakoreshwa. Ese ibi ni ukuri koko? Niba atari ukuri se bigira ingaruka zingana iki ku buzima bw’abafata iyo miti yarangiye? Haba habura iki se ngo habeho kwibwiriza gukura mu yindi, imiti igiye kurangira, hadategerejwe umunsi wa nyuma?

Ese niba kwibwiriza bidashoboka kubw’inyungu z’abacuruza imiti, habura iki ngo haboneke inzego zikora ubugenzuzi butunguranye kandi buhoraho (inspections improvisées et permenentes) mu mafarumasi no mu bigo by’ubuvuzi kuri iki kibazo?

Ubwo hamenwaga imwe mu miti yasanzwe yararengeje igihe

Kuwa 25/04/2019, Urwego rw’Igihugu rw’Ubugenzacyaha (RIB) na Minisiteri y’Ubuzima bafunze amwe mu mavuriro yagaragawemo imiti yarengeje igihe, n’andi makosa anyuranye. Mu bihe binyuranye, mu Karere ka Gasabo, Ngoma na Muhanga hagiye hafungwa Farumasi n’ibigo bitanga serivisi z’ubuzima nyuma yo kugaragarwaho amakosa arimo no gutanga imiti yarengeje igihe.

Igitangaje kadi kibabaje, ntibikorwa n’abigenga gusa bashaka inyungu y’umurengera, ahubwo n’ikigo cy’igihugu gishinzwe ububiko bw’imiti no kuyikwirakwiza (CAMERWA) cyigeze gusanganwa imiti yarengeje igihe kandi yaragauzwe ama miliyari y’amafaranga, ibitaro bya Faycal byigeze gusangwamo imiti yacyuye igihe, mu gihe Farumasi y’Akarere ka Rubavu nayo yigeze gufungwa izira gutunga iyi miti yarengeje igihe.

  • Ibiribwa n’ibinyobwa byarengeje igihe biracyaboneka henshi

Henshi mu bigo by’ubucuruzi bw’ibiribwa n’ibinyobwa (Alimentations, Supermarkets , Boutiques) hagaragaramo ibicuruza cyangwa ibinyobwa byarengeje igihe bitajya bivanwamo bagakomeza kubicuruza, n’umuntu ubashije kubigenzura bakamuguranira ariko ibindi bigakomeza gucuruzwa.

Amaguriro manini yo agabanya ibiciro by’ibigiye gucyura igihe, mu rwego rw’icyo bita “Promotion”. Ariko iyo ibiciro bigabanyijwe ku bicuruzwa bisigaje iminsi mike ngo birangire, ababirangura mu maguriro manini bajya kubicuruza mu makaritsiye, bikazarenza cya gihe cyo gupfa kwabyo, ibi nabyo ntibigenzurwa.

Mu mahahiro manini ibicuruzwa bimaze gusaza bigabanyirizwa ibiciro ngo bigurwe byihuse, ariko kenshi ababigura babikoresha byamaze kurenza igihe

Ikindi nuko hari abandi bahindura amashashi , bakabeshya ubwiza (quality ) abantu bakishyura amafaranga arenze ikiguzi cy’ibiri mu mashashi. Ingero ni nk’umuceli cyangwa kawunga aho abacuruzi bacuruza bahindura amashashi bagamije kwiba no kujijisha abaguzi, batanga umuceri wa Pakistan bawita uwa Tanzania. Habaho n’abahindura ibirango (Réétiquetage), bakimura itariki igicuruzwa kizapfiraho, bityo kikaguma mu iduka nyamara cyaracyuye igihe.

Ubwo Polisi yafatira muri Supermarket ibiribwa n’ibinyobwa byarengeje igihe
  • Ibiryo n’ibinyobwa bitujuje ubuziranmege mu ma Hotels na za Resitora

Mu mazu y’uburiro anyuranye arimo n’azwi nk’ayiyubashye, ni kenshi abantu bahandurira indwara zinyuranye ziganjemo izo mu nda (inzoka), Fièvre Typhoide n’izindi, bitewe n’umwanda. Abakozi twaganiriye batubwiye ko iyo akazi ari kenshi batabona umwanya uhagije wo koza amasahane, bakayinika mu mazi menshi, ubundi bakayahanagura, ku buryo igitambaro bayahanaguza hari ubwo kiba gisa n’itorosho. Inyama zisazira muri Frigo cyane cyane amafi n’inkoko, bitekerwa abakiliya bitagifite intungamubiri zazo, ahubwo zaramaze kuzuramo uburozi bita “Toxins”.

Umukozi muri Hotel imwe (tutavuze izina) mu zubashywe cyane muri Kigali yavuze ko nubwo bamena ibiryo byashaje, ntibashobora gukora ikosa ryo kumena inyama, ahubwo bateka izindi zamara gufata irangi bakavangamo za zindi zaraye zitetswe. Yagize ati: “Tujya tubigiraho ikibazo n’abakiliya, akarya inyama ikiri fresh, yarya indi akumva yarashaye iravungagurika, akatubaza niba ari inyama zimwe koko, … turiyeranja tukagira ibyo tumubeshya, ariko burya twe tuba tuzi ko iba imaze nk’iminsi itatu ine, igenda igaruka igaruka muri za zindi ziba zasigaye tukazivanga mu zatetswe ari nshya”. Yongeyeho ariko ko iyo bafite abashyitsi b’imena cyangwa inama mpuzamahanga, icyo gihe ngo ntibavangamo izaraye.

Ese ibi byo bizagenzurwa na nde, kandi ryari? Ese ko ari ukuri guhishwa, uzabigenzura we azabyemezwa n’iki?

  • Insinga z’amashanyarazi n’ibikoresho by’ubwubatsi bidafite ireme

Mu bindi bidafite ubuziranenge harimo ibikoresho by’ubwubatsi bikoreshwa inyubako igatangira kwiyasa imitutu itaranuzura. Hari n’insinga z’amashanyarazi zishyuhirana cyangwa zikababuka zikaba zateza impanuka nk’inkongi, nyamara ibi byose bikinjira hitwa ko hariho inzego zigenzura ubuziranenge bwabyo mbere yo kugezwa ku isoko ry’u Rwanda.

Aha Polisi yari yafashe insinga z’amashanyarazi zitemewe gucuruzwa mu Rwanda

  • Koherereza abafatabuguzi amazi n’umuriro ndengabipimo fatizo

Hari ubwo amazi yoherezwa ari menshi (Débit) bigaca uruhombo, hakaba n’ubwo umuriro nawo woherezwa ari mwinshi ugatwika ibikoresho byo mu nzu, amatara, ama televiziyo n’ibindi binyuraye biba bicometse. Impamvu ibitera ntijya ishyirwa ahabona, ariko se bizagenzurwa na nde , ryari?

Iyi nzu y’i Rusizi yatwitswe n’umuriro mwinshi w’amashanyarazi waje utunguranye

  • Gutaba no gutaburura fibre optique ubudahwema

Nta byumweru bibiri bishira badasatuye uyu muhanda cyangwa uriya, bataburura insinga za fibre optique ngo ziba zangiritse, bazisimbuza, cyangwa bakuramo zimwe, ubundi bakongeramo izindi.

Iri taba n’itaburura rya hato na hato risenya imihanda, ritera umwanda n’akajagari, hakibazwa impamvu hadatabwa ibyujuje ubuziranenge bitazatabururwa nyuma y’igihe kigufi cyane ngo birasimburwa, ubundi hakibazwa impamvu aho binyuzwa bucya hagawe bakifuza kubinyuza ahandi.

Bahora basatura imihanda ngo bahinduranye insinga za Fibre optique cyangwa se bazisana

RSB ivuga ko hari amavugurura menshi akiri gukorwa, atararangira ngo bibone gutungana

Ikigo cy’Igihugu Gitsura Ubuziranenge (RSB) ntigihakana ko hari bimwe mu bibazo bikeneye kwitabwaho mu buziranenge, ariko kikagaragaza ko bizarushaho kugenda neza amavugurura narangira.

Mu kiganiro na Simeon Kwizera Umuvugizi wa RSB yagize ati: “RSB ishinzwe gushyiraho amabwiriza y’ubuziranenge, kuyamenyekanisha ndetse no kuyahugura abafatanyabikorwa kugira ngo bayakurikize. Mbere ikigo cyashyiragaho amabwiriza y’ubuziranenge kikanakurikirana ishyirwa mu bikorwa ryayo. Ariko hagiye hajyaho ibindi bigo bifasha gukurikirana ishyirwa mu bikorwa kugira ngo RSB yo ikomeze ishyireho amabwiriza, itange serivisi zo gupima ndetse inatange ibirango by’ubuziranenge. Ariko nyamara RSB iracyashinzwe gukurikirana ubuziranenge bw’ibindi bitari ibiribwa n’imiti.”

Ku bahabwa ibirango by’ubuziranenge ariko bagakora ibitabwujuje, Kwizera avuga ko ko mu guhabwa ibirango by’ubuziranenge hari amasezerano (contrat) uhawe ikirango asinyana na RSB, akubiyemo ibyo azakomeza kubahiriza ndetse n’uko RSB izakurikirana ko bishyirwa mu bikorwa, bityo RSB igakomeza gukurikirana ko abahawe ibirango batadohoka kubyemeranyijwe.

Ku bijyanye n’amavugurura ariho no gusaranganya inshingano, Umuvugizi wa RSB yabisobanuye muri aya magambo: “ Mu gihe kiri imbere hazashyirwaho ikigo cyitwa RICA kizafasha kugenzura ibindi bicuruzwa bitari ibiribwa. Ubu RSB iracyakora izo nshingano mu gihe RICA itarajyaho. Hari ibigo byinshi bishinzwe kugenzura ubuziranenge: RURA igenzura ibijyanye n’ibikoresho by’ikoranabuhanga (Regulator) ariko abakozi bagenzura ibyinjira bitari ibiribwa kugeza ubu ni aba RSB bazaba aba RICA igihe izaba yagiyeho. MINAGRI mu ishami ryayo rya RALIS ishinzwe kugenzura ibikomoka ku buhinzi bitatunganirijwe mu ruganda”

Kwizera yakomeje avuga ko “Rwanda Foof And Drugs Authority” ari ikigo gishya kibarizwa muri Minisiteri y’Ubuzima cyafashe zimwe mu nshingano za RSB zijyanye no kugenzura ibiri ku masoko bikomoka ku biribwa ndetse n’imiti yaba iyinjizwa mu gihugu cyangwa ikorerwa mu Rwanda, ariko amabwiriza y’ubuziranenge yo agakomeza gushyirwaho na RSB gusa, ibigo bigenzura bikayashingiraho bigakora amategeko ngengamikorere (technical regulations) byifashisha mu kugenzura.

Kwizera Simeon ushinzwe imenyekanishamakuru muri RSB

Ku mikoranire n’izindi nzego zishinzwe ubuziranenge, Simeon Kwizera yagize ati: “RSB ikorana bya hafi n’ibi bigo byose kuko ibyo bikora bishingira ku mabwiriza y’igihugu y’ubuziranenge. Ati: “ Nka RURA ishinzwe kugenzura ko icuruzwa rya gaz rikorwa neza. Ariko RSB ishyiraho amabwiriza y’ubuziranenge ku macupa ya gaz, ikagenzura ko yujuje ubuziranenge, ishami ryayo ry’ibipimo rikagenzura ko ibiro byanditseku icupa rya gaz ari byo ndetse ikanareba ko ipfunyikwa rya gaz ryujuje ibisabwa n’amabwiriza y’ubuziranenge. RURA rero izagaruka ireba ko ucuruza Gaz yubahirije ibyo byose bisabwa ugaragaweho kunyuranya nabyo ikamuhana”

Umuvugizi w’Ikigo cy’Igihugu Gitsura Ubuziranenge RSB avuga ko basura ibigo babitunguye bagapima niba ibyo bikora byujuje ubuziranenge, kandi ngo bajya no ku masoko bagafaritayo bimwe mu bicuruzwa bakareba niba koko byujuje ubuziranenge byakagombye kuba bifite.

Ni nde uzagena ubuziranenge bwatuma bikorwa bikava mu nzira bidakomeje gutwara akayabo no kwangiza imihanda ?

NTWALI John Williams

One thought on “Kuzamura ireme ry’ubuziranenge bizakemura byinshi byangirikira mu burangare

  • 16th October 2020 at 4:10 pm
    Permalink

    This is very interesting, You’re a very skilled blogger.
    I’ve joined your feed and look forward to seeking more of your wonderful
    post. Also, I’ve shared your site in my social networks!

    Reply

Leave a Reply

Your email address will not be published. Required fields are marked *