BDF, mbere na mbere mu nyungu z’umuturage – Umuhigo wa Munyeshyaka

Umuyobozi Mukuru Mushya w’Ikigega BDF, Vincent Munyeshyaka yasezeraniye Abanyarwanda muri rusange n’abagenerwabikorwa ba BDF by’umwihariko, ko inyungu z’umuturage ari zo agiye gushyira ku isonga, kandi hakanakosorwa ikibazo cy’ubukererwe mu kwiga no gusubiza amadosiye.

Ibi yabitangaje ejo hashize tariki ya 29/12/2020, mu muhango w’ihererekanyabubasha hagati y’Ubuyobozi Bucyuye igihe n’ubuyobozi buteruye ikivi. Ni nyuma y’aho inama y’Abaminisitiri yayobowe na Perezida Kagame kuwa 14 Ukuboza 2020, yashyize mu myanya abayobozi bashya b’ikigega BDF, ikongeramo umwanya utari usanzwemo w’Umuyobozi Mukuru Wungirije, ikanashyiraho Abayobozi Bashya b’Inama y’Ubutegetsi ya BDF.

Mu myaka ikabakaba icumi ikigega BDF (Business Fevelopment Fund) kimaze gishinzwe, cyashimwe na benshi kigawa n’abandi mu mikorere yacyo. Abafite icyo banengaga ahanini bafatiraga ku kuba ngo gifasha abifite mu mikoro,  inyungu z’umuturage utangiza business iciriritse ntizirebweho. Abandi bakomeje kuyigaya ko itajya isubiza ubusabe bwabo bukirengagizwa, cyangwa igisubizo kigatinda cyane imishinga babaga bifuriza inguzanyo yararengeje igihe yacyo cyo kubagirira umumaro. Ibi bikaba byaragarukwagaho na bamwe mu bahinzi-borozi, abarangura mu mahanga ya kure, abanyabukorikori, n’abandi .

Vincent Munyeshyaka wakurikiranye imibereho ya BDF kuva igishingwa, na nyuma yaho ubwo yari Minisitiri w’Ubucuruzi n’inganda, mu ijambo rye akimara guhabwa ububasha bwo kuyobora BDF, no mu ijambo yagejeje ku bakozi ba BDF, yagarutse ku nyungu z’umuturage, ashimangira ko ari zo mbere na mbere zigomba gushyirwa ku isonga, BDF ikubakirwa icyizere gihamye.

Mu magambo aye afatiye ku bushobozi bwa BDF yita buke akurikije ubwinshi bw’imishinga n’ibyifuzo by’abantu bakeneye kunganirwa,  Vincent Munyeshyaka yagize ati: N’iyo ibyo twakora mu nyungu z’muturage byaba ari bike, ariko nibura bizabe bingana n’ubushobozi bwa BDF”. Aha yagaragazaga ko ku gipimo cyo hejuru, umusaruro w’ibikorwa bya BDF ugomba kungukira umuturage.

Vincent Munyeshyaka yasabye abakozi ba BDF ubufatanye no gukorera hamwe kugira ngo iyi ntego igerweho.

Egide Rugamba wari Umuyobozi w’Inama y’Ubutegetsi ya BDF icyuye igihe, yahaye ikaze abayobozi bashya, anashima abo bakoraney kubw’iterambere bagejeje kuri BDF, no kuba yari imaze kumenyekana hose mu gihugu, kandi uko imyaka itambuka ikarushaho kwitabirwa, ari nako yunganira benshi.

RWIGAMBA Eric, Umuyobozi mushya w’Inama y’Ubutegetsi ya BDF, yavuze ko bazubakira ku musingi usizwe n’ababanjirijemo, kandi ko bazakomeza kuzamura izina rya BDF, mu guhesha agaciro gakwiye icyizere bagiriwe.

Kurikirana birambuye umuhango w’ihererEkanyabubasha, mu majwi n’amashusho: (VIDEO)

Ihererekanyabubasha mu mafoto

John Williams NTWALI