Uganda yakoze umuti wa Covid, Museveni asezeranya n’urukingo

Sangiza abandi

Atangiza igeragezwa ry’umuti wa Covid 19, Perezida Yoweri Kaguta Museveni yavuze ko Afurika ifite ibyo ikeneye byose ngo yishakemo ibisubizo, itagombye gutegereza ko ibibazo byose bazabikemurirwa n’Abanyaburayi cyangwa Abanyamerika.

Ibi Perezida Museveni yabivuze ubwo mu gihugu cya Uganda hatangazwaga ko Kaminuza ya Makerere yakoze umuti wa Coronavirus hifashishijwe ibyatsi gakondo, magingo aya bakaba bageze mu cyiciro cyo kuwugerageza, ngo barebe igipimo ubasha kuvuraho.

Umuti wa Coronavirus wavumbuwe n’Abagande wiswe UBV-01N, iki gikorwa kikaba cyarashobotse ku bufatanye bwa Minisiteri y’Ubuzima, Kaminuza ya Makerere Ishami ry’Ubuvuzi, n’ibitaro bya Mulago.

Perezida Museveni yavuze ko Uganda ikwiye kugirira icyizere abahanga bayo, ikanabatera ingabo mu bitugu mu bushakashatsi bwabo bwose. Yabijeje inkunga ikomeye, kandi anashimangira ko atari umuti wa Coronavirus gusa bazagarukiraho ko ahubwo n’urukingo rwayo bazarwikorera.

Minisitiri w’Ubuzima muri Uganda Dr Jane Ruth Aceng yavuze ko uyu muti wa Coronavirus utangira kugeragezwa ku bantu mu bitaro bya Mulago, nyuma y’aho izindi nzego zose wagombaga kunyuzwamo ngo zemeze ubuziranenge bwawo zawunyujijwemo, kandi ugahabwa ibyangombwa bihamya ubwo buziranenge.

Dr Aceng Ruth yakomeje avuga ko nyuma y’igeragezwa ryawo ku barwayi ba Coronavirus ari bwo uzakorwa ku bwinshi mu ruganda, ukanakwirakwizwa

Uretse kuba witezweho kuvura abarwayi ba Corona, ngo uyu muti uzaba ufite n’ubushobozi bwo gusana no kugabanya ubukana bw’ibyo iyi Virus iba yarangije mu mubiri w’umuntu.

Mu kwezi kwa 12 umwaka wa 2020, hari abarwayi basaga icumi byemejwe ko bakize nyuma yo gufata umuti nawo wari mu igeragezwa muri Uganda.

John Williams NTWALI

Leave a Reply

Your email address will not be published. Required fields are marked *